A San Placido

Plazzitu santu quanni ti nutristi lu mari di li grazi ritrovusti, picciriddru di nenti ca nascisti, la morti e passioni di Cristu cuntiplasti e quannu Binidittinu ti vististi li pompi e li grannizzi abbannunasti.

Alla Madonna delle Catene

Beddra matri da catina! A nuddru aiu pi vicina, sulu a vui Matri divina! Unnava a passari sta jurnata e aiu a essiri cunsulata. Cuomu dicu l'Ave Maria, Madonna! A grazia avi a essiri mia.

A Sant'Antonio

Sant'Antuninu bieddru paduvanu, divotu di Maria celesti e finu, ssu bambinieddru c'aviti a li manu, priatici pi n'uatri sant'Antuninu. Tridici grazi aviti di cuntinu, cunsulatini vui sant'Antuninu.

A San Giuseppe

San Giusippuzzu giustu e santu, 'ntesta purtasti lu Spiritu Santu. 'nta li manuzzi lu santu vastuni, siti lu patri di nuostru Signuri. Pì ddru viaggiu ca facistuvu in Egittu, cunsulatimi vui stu cori afflittu. Maria la rosa, Giuseppi lu giugliu, datini aiutu, cunfuortu e cunsigliu.

Preghiera della sera

Io mi curcu 'na stu liettu, cu Maria supra lu piettu,
io duormu e iddra viglia, si c'è cosa m'asdruviglia.
Cu Gesu mi curcu, cu Gesu mi staiu,
stannu cu Gesu paura nu naiu.
Io mi curcu all'abbannunu, a Madonna mi cupuna,
mi cupuna cu so mantu, in nomi du Patri, du Figliu e du Spiritu Spiritu Santu.
Io chiuiu la porta mia, cu lu mantu di Maria
E li chiavi di San Simuni,
Diu ci ni scansi di mali pirsuni.

Recita dei misteri durante il Santo Rosario

Gaudiosi

  • Dio ci manna l'ammasciata, è di l'angilu avvisata, ca lu Figliu di Diu Patri a Maria si farà Matri. O gran Vergini Maria mi ni cunsuolu assai cu tia.
  • Vi partistuvu cu grann'affettu, a visitari Elisabetta. San giuvanni unn'era natu e pi vui santificatu. O gran Vergini Maria mi ni cunsuolu assai cu tia.
  • 'Nta na povira mangiatura parturì la Gran Signura e Gesuzzu Bamminieddru, mienzu u voi e l'asinieddru. O gran Vergini Maria mi ni cunsuolu assai cu tia.
  • Cuomu l'atri fimmineddri, peccatrici e puvirieddri, a la chiesa vinni istivu e a vuostru figliu a Diu l'offristuvu. O gran Vergini Maria mi ni cunsuolu assai cu tia.
  • Quannu a Gesuzzu lu pirdistuvu, lu circastivu e le sintistivu, ca spieava la duttrina cuomu ostia divina. O gran Vergini Maria mi ni cunsuolu assai cu tia.

Dolorosi

  • Gesù a l'uortu si dispone pi fari orazioni, e pinsannu a li piccati, sangu veru Diu ha sudatu. O gran Vergini Maria, la vostra pena ancora è mia.
  • Quannu a Gesuzzu lu pigliaru, lu spugliaru e l'attaccaru. Li so carni fracillati cu semila vastunati. O gran Vergini Maria, la vostra pena ancora è mia.
  • "Re di burla" fu ncurunatu, cu na canna svergognatu. O gran Vergini Maria, la vostra pena ancora è mia.
  • A la morti è cunnannatu, cuomu un latru scelleratu. La so cruci allegru porta, nuddru c'è ca lu cunforta. O gran Vergini Maria, la vostra pena ancora è mia.
  • A la vista di so matri, è crucifissu fra du latri. Muriu a forza di duluri, lu me caru redenturi. O gran Vergini Maria, la vostra pena ancora è mia.

Gloriosi

  • Gesù Cristu resuscità, di la so morti triunfà. Cuomu re trionfanti, scarzerau li petri santi. O gran Vergini Maria, mi nin rallegru assai cu tia.
  • Duppu po quaranta jorna, Gesù Cristu 'ncelu torna, e a Maria cu li so amici, si l'abbrazza e binidici. O gran Vergini Maria, mi nin rallegru assai cu tia.
  • Deci jorna puoi passaru e l'apuostuli priaru, e Maria ca li trattinni, lu Spirdu Santu vinni. O gran Vergini Maria, mi nin rallegru assai cu tia.
  • Vinni l'ura di partiri, Maria 'ncelu iu a gudiri. O chi santa morti fu, morsi'mbrazza di Gesù. O gran Vergini Maria, mi nin rallegru assai cu tia.
  • Maria 'ncelu triumfà, n'arma e un cuorpu 'ncelu stà. Fu 'ncrunata di Rigina, di l'Iternità Divina. O gran Vergini Maria, mi nin rallegru assai cu tia.